Los Angeles 2028NewsParis2024

Shete atleta local a ricibi nan Beca Olimpico

Comite Olimpico Internacional a otorga Beca Olimpico pa e Weganan Paris 2024

Diaranson mainta den e sala di SSA na Dakota, Comite Olimpico Arubano, seis atleta local a firma e Beca Olimpico como preparacion pa e Weganan Olimpico Paris 2024. E aña aki un bez mas, Comite Olimpico Internacional a otorga Beca Olimpico pa e Weganan Olimpico Paris 2024 na nos atletanan local. Presente na e acto di firmamento nos por a mira shete atleta(seis presente y un virtual), algun miembro di e directiva di COA, e Direccion Tecnico di COA, e federacionnan AAF y AWB y e mayornan di e atletanan. E atletanan Chloe Farro, Elisabeth Timmer, Anahi Schreuders, Patrick Groters, Mikel Schreuders di landamento, Shanayah Howell di ciclismo, BMX y Ethan Westera di sailing a keda escohi pa bin na remarke pa haya e Beca Olimpico.

E beca Olimpico tin como meta pa duna un atleta apoyo di e nivel mas halto, pa asina e por prepara su mes miho y trata di logra un clasificacion pa Weganan Olimpico. Cu e apoyo aki e atleta tin acceso na facilidadnan di entrenamento superior, na entrenadonan specialisa y por participa na mas competencia clasificatorio. Mas cu claro e ta un ayudo y sosten financiero tambe pa e atleta por cubri su gastonan. Despues di un proceso riguroso a yega finalmente na e 7 atletanan envolvi, pues ta e 7 atletanan aki tin e chens mas real pa por logra un clasificacion Olimpico.

COA a presenta e 7 candidatonan na Olympic Solidarity di Comite Olimpico Internacional algun luna pasa, cu na su turno a envolvi e respectivo federacionnan internacional, cu a analisa si e atletanan tin suficiente nivel tecnico pa por bin na remarke pa un beca. Despues di varios luna e bon noticia a drenta: IOC a aproba pa otorga na e shete atletanan un beca Olimpico pa Paris 2024! Un logro grandi pa e atletanan, un logro grandi pa deporte Arubano.

E atletanan ta biba, studia y eherce nan deporte den exterior(cu excepcion di Shanayah Howell), nan lo sigui entrena den exterior, como parti di nan desaroyo deportivo. E beca ta yuda cubri un parti di e gastonan envolvi cu e preparacion ta trece cun’e. Ta spera en berdad cu e beca lo yuda Chloe, Elisabeth, Anahi, Shanayah, Patrick, Mikel y Ethan progresa den deporte y logra un clasificacion pa e Weganan Olimpico di Paris 2024. COA tin sigur cu cada un di e atletanan aki lo sa di haci bon uzo di e oportunidad aki, y cu e lo produci e resultadonan cu tanto nos ta anhela.

Related Articles

Check Also
Close
Back to top button