Pabien riba dia di Hende Muher
Atletanan Olimpico femenino a pone Aruba riba e mapa mundial den deporte.
E clasificacion pa e Weganan Olimpico di Rio de Janeiro 2016 di e atletanan femenino, Nicole van der Velden(Sailing), Philipine van Aanholt(Laser), Allyson Ponson(Landamento) y Monica Pimentel(Taekwondo) tabata simplemente un muestra di e progreso y dominio di nos hende muhernan den e deporte local. Pa hopi aña nos atletanan femenino a sobresali na nivel internacional mas cu nos atletanan masculino. E atleta femenino Nicole van der Velden tabata e prome atleta local cu a yega e nivel cu tanto nos a anhela pe esta esun Olimpico. Na Aarhus, Dinamarca e atleta di Aruba a haci historia door di bira e prome cu a clasifica pa Rio 2016. Pero e no a keda na e atleta van der Velden so, algun siman despues e atletanan van Aanholt, Ponson y Pimentel(tur femenino) a sigui e pasonan di Nicole. Hunto cu e atletanan masculino Mikel Schreuders, Thijs Visser y Jayme Mata nan a forma e delegacion cu a representa nos pais na e Wegana Olimpico di Rio 2016.
Aña pasa un bes mas Aruba su atletanan femenino esta Kayla Arends y Mali Rafini ta haci historia pa nos dushi isla ora nan ta logra como e promenan, e clasificacion pa e Weganan Olimpico Hubenil Buenos Aires, Argentina.
No tin duda cu nos representantenan femenino den deporte a sa na laga Aruba su nomber resona den exterior. Esaki ta danki na nan propio corahe, sacrificio y determinacion pa logra lo maximo pa na mes, nan deporte y Aruba.
