Panam Sports ta reconoce Aruba

Panam Sports ta reconoce Aruba como Pais Revelacion di e Weganan Sur Americano 2022.

Premio Panam Sports Pais Revelacion Asuncion 2022: ARUBA

“E pais chikito y bunita aki situa den Caribe cu un tiki mas di 100 mil habitante a bini cu un delegacion chikito di apenas 12 atleta a bira e berdadero sorpresa di e Weganan Odesur. Aruba a sa na obtene un logro historico den e Weganan Sur Americano ganado 3 medaya di Oro y 3 medaya di Plata, esakinan den bowling, landamento y bela”, asina ki Panam Sports a anuncia Aruba den nan Panam Sports Award 2022.

Esaki sin duda tabata un momento di emocion y orguyo pa nos pais y nos delegacion na Asuncion, Paraguay. Nunca antes Aruba a logra obtene asina hopi medaya den un Wega Sur Americano/ODESUR. Es mas nunca, Aruba a logra gana un medaya di Oro den e Weganan Sur Americano/ODESUR mientras awor nos a gana tres Oro den un solo wega grandi. Pa e deportenan di Bowling y Landamento esaki tabata historia ya cu ta nan prome medaya di Oro den un Wega Sur Americano/ODESUR. Pa e deporte di Bela e medaya di Plata tabata e prome pa e deporte acuatico den un Wega Sur Americano/ODESUR. Por ultimo, ARUBA como pais ta logra un di 10 lugar overall riba e tablero final cual ta e clasificacion mas halto obteni pa nos pais den un Wegan Sur Americano/ODESUR.

Panam Sports ta e organisacion cu ta representa e 41 Comite nan Olimpico Nacional di henter e continente America.
Pabien super grandi na henter nos delegacion di Aruba pa e magnifico dos siman di alegria cu Aruba a biba cune.