Teodulo (Dooley) Tromp

Teodulo (Dooley) Tromp
President 1985-1995

Dooley Tromp tabata e prome president di Comite Olimpico Arubano, desde su fundacion na augustus 1985 te cu april 1995.
E otro miembronan di e directiva tabata:
Marcolino (Nilo) Croes, vice-president; Clyde Croes, secretario general; Cesar Kip, tesorero; Francisco (Chipen) Chirino, asistente secretario general; Luciano (Wichi) Croes, segundo tesorero y comisarionan Rick Altman, Thomas (Tommy) Croes, y Harry Janssen.

E prome directiva a wordo eligi y nombra door di e federacionnan di deporte Arubano cu alabes ta e fundadonan di Comite Olimpico Arubano. Na aña 1988 durante e Asamblea General a eligi un directiva nobo pa 4 aña, den cual a aparece algun cara nobo: Kenky Oduber, Rufo de Cuba y Carlos Bislip. Carlos
a resulta un contribuyente sumamente valioso pa Comite Olimpico Arubano den su funcion di secretario general. Su experiencia di taya internacional den pasado como vice-president di e Federacion Mundial di Judo a contribui na esaki. Lastimamente e no por a termina su mandato pa motibo di su fayecimento inespera despues di dos aña. Na 1992 a bolbe surgi algun cambio den directiva na momento cu Rudy Leysner a keda eligi como vice-president.

E prestacion di nos atletanan den competencia di nivel haltisimo durante di e weganan olimpico por wordo evalua como satisfactorio. E acontecimentonan importante cu Comite Olimpico Arubano a experiencia ta entre otro su reconocimento hopi rapido door di Comite Olimpico
Internacional na october 1986, e bishita na Aruba di e president di Comite Olimpico Internacional Marques Juan Antonio Samaranch (q.e.p.d.) na 1988, e prome aparicion di nos flamante bandera nacional den e ceremonia y desfile di inauguracion di e Olimpiada na Seoul, na Sur Korea na 1988 y e invitacion di comite organisado pa celebracion di e 100 aña di existencia di Comite Olimpico Internacional (1894-1994) pa hiba palabra den e Congreso Extraordinario di Comite Olimpico Internacional na Paris na Francia na 1994.

Conmemoracion di e di 6 lustro di existencia di Comite Olimpico Arubano pa tur nos deportistanan y demas miembro di famia olimpico mester ta un momento di gran satisfaccion y orguyo. Nos sincero gratitud ta bay na tur esnan cu ya a logra y expresa speransa na tur esnan cu den futuro lo
representa nos pais dignamente. Felicitacion di curason na e actornan di actualidad, pero na mes momento gran reconocimento na esnan cu a bay nos dilanti. Masha pabien cu e aniversario memorabel y mas exito den futuro.