News

Raymundo (Mundo) Kemp (1922 – 2007)

Futbol

Mundo Kemp na 1958 — Foto for di ‘veertiende ASU Olympiade’ 1968

Raymundo Kemp miho conoci como Mundo Kemp a forma parti di e seleccion Antiano cu a participa na e Olimpiada di Helsinki na Finlandia na aña 1952. E mes no a hunga den e unico partido cu Antias Hulandes a hunga den e campeonato aki, cu tabata contra Turkia caminda Antias Hulandes a keda elimina for di e campeonato olimpico. Si por a nota cu Mundo a hunga den casi tur e weganan di fogueo cu Antias Hulandes a hunga na Hulanda y Francia prome cu a sali pa Helsinki (contra: Blauw-Wit, Feyenoord, e team di bond di Hulanda cu a representa Hulanda na Helsinki e team amateur Frances y NEC di Nijmegen). E corantnan di e tempo aya tabata papia hopi positivo di su futbol

y su bon trabou den defensa – y tin biaha tambe – como rechtsbinnen.
Mundo Kemp a lanta den e bario di Rancho na Playa. E tabata hunga prome y despues di e Weganan Olimpico di Helsinki pa Aruba Jrs. Como hungado di bond el a hunga na 1944 contra Surnam y na 1946 contra e team di Lago. Na 1949, como hungado di Aruba Jrs. Mundo a reforsa SUBT di Corsou den e partidonan cu SUBT a hunga contra e ekipo Asturias di Mexico. SUBT a gana ambos partido.

Na 1950 Mundo Kemp a hunga den e CAC Games na Guatemala. E CAC Games cu ya for di 1930 ta reconoci pa Comite Olimpico Internacional y cu ta tuma luga cada pasa 4 aña, ta fungi como un pre-seleccion pa e siguiente weganan olimpico.

Den e Weganan di 1950 e seleccion di Antias Hulandes bou auspicio di Nederlands Antilliaans Olympisch Comité pa prome biaha den su historia a bira campeon Centro- Americano y di Caribe.

Mundo Kemp a hunga un papel importante den e campeonato aki y tambe a score un gol.

E merito di a bira e campeon di futbol Centro-Americano y di Caribe den e CAC Games a pone Antias Hulandes cualifica pa e Weganan Olimpico di 1952.

Despues di e Weganan Olimpico di 1952 Mundo a keda milita pa basta aña mas den su team cual ta Aruba Jrs. – bisa, den e tempo di gloria di Aruba Jrs. – y tambe pa e team di AVB. Tur esaki a conduci cu principalmente den e prome parti di e añanan cincuenta e tabata un hungado estelar cu a hunga un considerabel cantidad di partido local y internacional.

Hungadonan di Aruba y di Corsou cu a forma parti di e seleccion di Antias Hulandes na e Campeonato di CCCF na Costa Rica 1953: memey dilanti den flanel mas scur y carson blanco Nunchi Hernandez, para: di tres banda robes Cai Helder, para: di dos banda robes Juan Briezen, para: di prome banda drechi Janny Brokke, fila mas abou di dos banda drechi Mundo Kemp. Ta aparece tambe riba e foto: Marco Tromp, Gabriel Kelly, Simeon Molina, Bernard Hoftijzer y Juchi Jansen — Foto for di ‘Historia di Futbòl di Kòrsou 1921-2006, Valdemar Marcha (ed), 2008’

Mundo Kemp a participa na e Campeonato di CCCF 1953 na San Jose na Costa Rica. Di e partidonan cu e seleccion di Antias Hulandes, cu tabata forma pa Aruba y Corsou su miho futbolistanan di e temponan aya, a hunga den e campeonato aki, el a hunga den 4 di en total 6 partido. Den e partido contra Nicaragua el a score dos bes. Antias Hulandes a gana Nicaragua 8-0. Mundo a hunga tambe den e partido contra Panama cu Antias Hulandes a gana 4-2. Den e partido contra Costa Rica Antias Hulandes a perde 1-0 y contra Honduras Antias Hulandes a perde 4-3.

El a participa den e Campeonato di CCCF 1955 na Tegucigalpa na Honduras. Den e Campeonato aki e Arubianonan a participa cu nan propio seleccion y Corsou tambe a participa cu su propio seleccion. Mundo Kemp a hunga den tres partido (a participa 6 pais): Costa Rica-Aruba 3-2; Corsou- Aruba 2-1 y El Salvador-Aruba 2-0.

El a participa na e Campeonato di CCCF 1957 cu a tuma luga na Willemstad na Corsou. Un seleccion di Corsou a representa Antias Hulandes den e campeonato aki. Despues di e campeonato aki e seleccion di Aruba a hunga na Aruba tres partido amistoso, 1 bes contra e ekipo di Panama y 2 bes contra Haiti cu tambe ta e ekipo cu a sali campeon di e campeonato na Corsou. Den tur tres di e partidonan aki Mundo Kemp a hunga: contra Panama, e wega a sali tabla 2-2 y Mundo a anota 1 gol; Contra Haiti e prome partido Aruba a gana cu e score di 3-1 y e di dos e wega keda tabla 2-2. Not bad Aruba!

Na 1959 Mundo a forma parti di e seleccion di Antias Hulandes cu a participa na e CAC Games na Caracas, Venezuela.

Despues di su impresionante carera di futbol competitivo Mundo Kemp a keda traha den e campo di futbol, esaki el a haci como miembro di e directiva di club Aruba Jrs. y como referee den añanan sesenta. E tabata tambe un bon tenista y masahista.

Related Articles

Back to top button