Wanda Broeksema ta elabora riba firmamento
Acuerdo cu Aruba Tourism Authority ta un stap grandi den e bon direccion
Presidente di COA, Sra. Wanda Broeksema
“Acuerdo cu Aruba Tourism Authority ta un stap grandi den e bon direccion pa nos atletanan y e deporte na Aruba”.
Durante e firmamento di e acuerdo entre ATA y COA, presidente di COA, sra. Wanda Broeksema a duna su punto di bista y a mustra riba e importancia y balor cu e acuerdo aki tin pa Comite Olimpico Arubano y Aruba Tourism Authority.
“Nos tin dos anja ta warda pa e momento aki debi na Covid, pero e timing ta uno perfecto pa firma un partnership. Desde dos anja pasa, COA y ATA tabata den combersacion riba e difetrente topico manera, e importancia di e deporte na Aruba, kiko COA y ATA por significa pa otro riba e tereno aki y con hunto por eleva e talento di nos atletanan y con nos por identifica esakinan”, sra Broeksema a bisa.
E partnership entre Comite Olimpico y Aruba Tourism mester bira un ‘win-win situation’ pa ambos partido. COA lo kier promove mas e balornan Olimpico, cual ta un area hopi importante unda COA kier pa nan atletanan subraya esey no solamente na Aruba pero sigur tambe den exterior mirando e calendario di actividad hopi ocupa cu COA su atletanan ta bishita cada anja.
Pa sra. Broeksema hiba e nomber di Aruba tur caminda cu bo bay ta algo cu cada atleta mester ta orguyoso di dje; “Nos atletanan mester ta orguyoso di por representa Aruba den exterior. COA ta contento cu tin organisacion of compania nan cu ta kere den COA pa asina yuda nos atletanan y e federacionnan deportivo den nan desaroyo pa bira mihor cada dia”.
Por ultimo, Sra. Broeksema a gradici Aruba Tourism Authority pa e 4 anja nan di partnership cu sin duda lo bira uno grandi y valioso pa Aruba su deporte.
