E Weganan Panamericano Lima 2019 a yega su final cu Aruba marcando historia cu nos prome medaya di e weganan.
Diadomingo anochi e mahestuoso 18 edicion di e Weganan Panamericano a yega su final. Sin duda e ciudad di Lima a score halto cu e dicho weganan. Pa 7or exacto a cuminsa cu un show artistico inspira pa e cultura peruano, cu a conta cu un creacion di 1,000 trahenan vistosos, sigur hopi colorido y unico den su estilo.
Despues a yama tur e paisnan participante na e weganan drenta e Estadio Nacional cu tabata repleto di hende. Mas cu claro mei mei tur pais, nos delegacion di Aruba y nos medayista Panamericano Mack van den Eerenbeemt cu tabata tin e honor di carga e bandera di Aruba. Aki cuater anja e ciudad di Santiago, Chile lo host e di 19 edicion di e Weganan Panamericano esaki na 2023. Dignitarionan di tanto Panam Sports, Peru y Chile a haci e acto di traspaso pa asina oficialmemte cuminsa cu e preparacion di e Weganan di Santiago 2023. Durante e anochi festivo e cantautor peruano Gina Marco Zignago a deleita tur presente cu su musica unico.
Nos atletanan sigur a haci nan maximo esfuerso y mustra e mihor di nan mes durante di e Weganan Panamericano na Lima, Peru. Den algun momento nos atletanan a luci y hasta haya e oportunidad pa competi pamun medaya mientras den otro momento e prestacion por tabata mas mihor. E nivel Panamericano ta uno haltisimo pero e hecho cu mayoria di nos atletanan a clasifica ta un muestra cu nos a yega e nivel cu e ta exigi.
Aruba sigur por ta satisfecho cu e prestacion di henter nos delegacion aki na Lima Peru
