News

Nicole ta elabora riba e bishita di Thakaidzwa

A reuni riba henter e proyecto entre Aruba y Corsow

Secretaria general di COA, sra. Nicole Hoevertsz ta elabora riba e bishita di Thakaidzwa Doran, e liason di Comite Olimpico Arubano na Corsow.

Den e dianan tras di lomba, Comite Olimpico Arubano a ricibi bishita di nan persona di contacto na Corsow, sr. Thakai Doran unda a reuni riba henter e proyecto entre Aruba y Corsow pa cu representacion di e atletanan di nos isla ruman pa Aruba den exterior.

Den un combersacion cu Secretaria General di COA, sra Nicole Hoevertsz a la conta lo siguiente.

Status di Corsow den deporte desde 2010 ta cu desde cu Antiyas Hulandes a stop di existi, a bira complica mirando cu Corsow ya no tin un Comite Olimpico reconoci mas. E pregunta cu a bini padilanti ta con e atletanan di Corsow lo competi. Pa algun anja IOC permiti atletanan di Corsow representa sea Hulanda of Aruba.

Na 2019 a surgi un error na nivel Panamericano unda cu e federacionnan continental a permiti tres atleta di Corsow drenta e proceso clasificatorio pa e Weganan di Lima 2019, mientras cu Corsow no tin e status pa participa na e Weganan. Aki ta caminda cu IOC y Panam Sports a aserca Comite Olimpico Arubano (COA) pa yuda yega na un solucion, door di acepta e atletanan den e delegacion di Aruba. COA di su banda a acepta pa e atletanan competi bou bandera di Aruba ya cu a pone e interes di e atleta na prome lugar.

Pa cu esaki COA a pone tres condicion riba mesa. E prome tabata cu e atleta di Corsow no por tuma cupo di e atleta di Aruba, dos tabata cu e atleta di Corsow no por tuma placa di e atleta di Aruba, pues aki Olympic Solidarity mester pone placa adicional. Por ultimo e forma cu COA ta traha cu e federacionnan di Aruba mester ta aplicabel pa e federacionnan di Corsow tambe. Mester bisa cu tur tres condicion a ser acepta door di IOC y Panam Sports y te ainda ta aplicabel.

No obstante cu te awor e cosnan ta canando bon, tog Olympic Solidarity no kier pa COA tin tur esaki como un proyecto apart. Nan ta di opinion cu e atletanan di Corsow mester wordo inclui den e planificacion final di COA. Pa es motibo aki persona di contacto pa cu e federacionnan y deporte na Corsow, sr. Thakai Doran actualmente ta na Aruba pa discuti riba e proyecto aki. Awor ta papiando riba tur e detayenan, e dificultadnan cu a encontra den practica cu a kere cu lo bay facil pero no tabata asina.
Locual ta importante ta cu Olympic Solidarity a inverti basta hopi den e proyecto. Un ehempel ta e 75 mil dolar cu e atleta di vela di Corsow, Philipine van Aanholt a haya pa cu su preparacion pa e Weganan Rio 2016. Mescos tabata e caso di e tres atletanan di Corsow cu a participa na e Weganan di Lima 2019 unda a ricibi 57 mil dollar. Mester bisa cu pa e ciclo nobo aki ya caba Olympic Solidarity a absorba 100 mil di e 116 mil dollar pa e projecto. Awor COA ta den e proceso di reparticion ya asina e atletanan por haya un trankilidad pa nan por prepara y competi y trata na clasifica pa e Weganan den bista.

Mirando e maneho nobo di COA cu ta conta pa federacionnan di Aruba y Corsow, es cu kier competi pa COA mester logra resultado. COA ta contento di por brinda e atletanan di Corsow e oportunidad paso sin esaki e atletanan di nos isla ruman no por competi den e continente Panamericano. Mester bisa si acerca cu weganan regional manera e Weganan Centro Americano y del Caribe como tambe Weganan Suramericano (ODESUR) aki si Corsow por participa como pais, ya cu nan a ser acepta como “miembro asocia”, aunke nan no tin e derecho di voto, ni aceso na fondo pero si por competi bou bandera di Corsow. Na Weganan CAC di Barranquilla 2018 nan participa cu un delegacion pa prome biaha mientras otro anja na San Salvador un bes mas Corsow lo ta presente. Luna pasa ainda Corsow a participa na e Weganan ODESUR Asuncion na Paraguay pa prome biaha. Pero awor si e atleta di Corsow kier participa na tur e weganan inclui Weganan Panamericano y Weganan Olimpico e ora ey e lo mester competi pa Aruba den un solo trayectoria.

COA ta contento cu por traha cu Thakai Doran pa asina delibera henter e proceso rond di e deporte di Corsow cu lo por representa Aruba. Hopi reunion ta tumando lugar via Zoom pa asina tur cos cana segun palabracion.

Related Articles

Check Also
Close
Back to top button