Prome Minister Evelyn Wever-Croes y Minister Endy Croes a ricibi nan uniform oficial di Weganan Olimpico Paris 2024
Awe mainta den sala di Ministerraad a tuma lugar entrega di e uniform oficial cu delegacion di Comite Olimpico Arubano lo uza na e Weganan Olimpico Paris 2024. Secretaria General di COA, Nicole Hoevertsz, a hasi e entrega na Prome Minister di Aruba, Evelyn Wever-Croes como tambe Minister di Deporte, Endy Croes. Na mes momento a splica e mandatario nan con a yega na e diseño di e ciclo nobo cu ta hiba e nomber di “Fauna”.
Tambe a elabora riba e importancia di e Weganan aki y cu Paris 2024 lo ta e prome Weganan Olimpico cu lo ta “Gender Equality”, pues lo conta cu representacion igual di masculino y femenino. Na mes momento e entrenamento di cada un atleta cu ta bay representa nos Isla na Paris 2024 a wordo splica tambe na ambos mandatario.
Presente tambe awe mainta tabata Hefe di Mision, Kamilah Dammers y Jonathan Wever, miembro di Direccion di Deporte.
