Team Aruba lo ta fuerte na Barranquilla

Team Aruba lo ta fuerte representa na e Weganan Centro Americano y del Caribe Barranquilla 2018.

Diamars y diaranzon gran parti di e delegacion di Aruba a sali pa e Weganan Centro Americano y del Caribe cu lo inicia diahuebs awor cu e ceremonia di apertura na e ciudad di Barranquilla, Colombia. Algun dia atras e prome dos atletanan a biaha pa e competencia cu tabata e atleta elite den RS-X, Mack van den Eerenbeemt y e medayista di Oro den e Weganan Centro Americano y del Caribe Veracruz 2014, e atleta elite di Laser Radial, Philipine van Aanholt. Diamars y diaranzon e grupo mas grandi consisti di atleta y entrenadornan, e staf medico y tecnico y prensa a biaha pa Colombia.

E atletanan cu lo representa Aruba den e Weganan Centro Americano y Del Caribe Barranquilla ta den

Atletismo: Wuill Vrolijk, Micheal Rasmijn, Merle Duinkerk

Bowling: Jeadine Luidens, Yannick Roos, Elias Halabi, Thashaina Seraus, Kamlah Dammers, Vanessa Valdes, Abigail Dammers, Valentino Jacobs, Jonathan Bremo, Chris Figaroa, Xanthe Lobrecht.

BMX: Feddison Flanders

Sailing: Mack van den Eerenbeemt y Philipine van Aanholt

Tiro: Philipe Elhage

Landamento: Anahi Schreuders, Mike Schreuders, Patrick Groters, Jordy Groters, Daniel Jacobs

Landamento Artistico: Kyra Hoevertsz y Abigail de Veer

Taekwondo: Monica Pimentel

Tennis di Mesa: Jeandry Mathilda

Pesas: Jennifer Piter

Triatlon: Renze Postma

Na anja 2014, e Weganan Centro Americano y del Caribe na Veracruz a bira uno inolvidabel y historico pa Aruba. Un delegacion di 32 atleta a clasifica pa e Weganan aki cual ya caba tabata un record riba su mes. Den casi tur nuebe deporte cu Aruba a participa a logra un resultado satisfactorio of a surpasa e expectativanan. Como pais, Aruba a termina na di 11 luga riba e tabla di posicion den 32 pais, esaki ta esun di mas miho pa un delegacion cu a bishita cualkier competencia cu COA a participa na dje.

E medayanan di Aruba a ser gana pa Kamilah Dammers cu a logra un medaya di Oro den e competencia individual y un di Plata den Masters. Dammers a impone 8 record den boliche, cual un di nan un “perfect game” cu ta 300pins(12 strike sigui), algo cu nunca antes a pasa den historia e Weganan CAC pa un hungado femenino. E atleta di vela, Philipine van Aanholt a logra medaya di Oro den e disciplina Laser Radial mientras e atletanan di landamento sincronisa, Anouk Eman y Kyra Hoevertsz a conkista medaya di Brons den duet liber. Tanto Kamilah Dammers, Kyra Hoevertsz y Philipine van Aanholt lo tey atrobe na Barranquilla.

Na aeropuerto, un grupo di famia y conocirnan a bin despedi di e delegacion. Comite Olimpico Arubano y Aruba completo kier a desea e delegacion di Aruba tur clase di exito durante di e Weganan Centro Americano y den Caribe 2018 na Barranquila, Colombia.