Team Aruba ja a surpasa e exito di Veracruz2014
E Weganan di Barranquilla2018 ta mas cu un exito caba
Team Aruba ya caba a surpasa e exito di e cantidad di medayanan logra na e Weganan di Veracruz 2014 na Mexico.
Falta algun dia mas pa e Weganan di Centro Americano y del Caribe Barranquilla 2018 yega su final. Pa e delegacion di Aruba of miho bisa Team Aruba ya caba e weganan ta mas cu exitoso. E mas exitoso den historia te cu awor aki. Dicon? Paso nos atletanan a logra surpasa e cantidad di medayanan logra den Weganan CAC.
Na 2014 cual tabata e weganan mas exitoso den historia di Aruba su deporte, Team Aruba a logra no menos cu 4 medaya di cual 2 di Oro, 1 di Plata y 1 di Brons. E dos medaynan di Oro tabata pa Philipine van Aanholt y Kamilah Dammers-Naddall mientras e propio Kamilah a logra e medaya di Plata. E medaya di Brons a bay pa e tempo ey e duet di Kyra Hoevertsz y Anouk Eman di synchro. Na e Weganan CAC Barranquilla 2018 te cu awor aki ya caba Team Aruba a conkista 6 medaya(2 mas cu Veracruz). Nos a gana 2 Oro, 1 Plata y 3 Brons. E medayanan di Oro a bay pa Mack van den Eerenbeemt y Thashaina Seraus mientras e medaya Plata a wordo gana pa landado Mikel Schreuders cu ta logra Brons tambe. Diasabra Kyra Hoevertsz ta logra medaya di Brons, y awe mainta ta logra medaya di Brons cu ta bira e di 6 medaya pa nos dushi isla. Sin duda nos atletanan a demostra cu nos por bataya entre e grandinan den e region Centroamerica y Caribe.
Mester bisa cu falta algun atleta mas pa bini den accion. Y no por descarta cu e oportunidad tey pa logra mas medaya door di Team Aruba. Claro e alegria ta grandi mirando cu tur atleta a demostra e miho di nan mes na e weganan aki. Tur a traha duro pa yega Barranquilla, mientras algun a keda net cortico pa un lugar riba podium. No obstante di esaki, e satisfacion di por representa Aruba den un competencia di magno nivel ta keda e obhentivo number uno pa hopi di nos atletanan elite.
For di awor caba un palabra di pabien na TEAM ARUBA COMPLETO
