COA y IBISA a bishita Parke di BMX, Street Wise na San Nicolas.
Diabierna atardi un delegacion di Comite Olimpico Arubano hunto cu IBISA a bishita e parke di bike cross di e ekipo di Street Wise na San Nicolas. Presente nos por a mira presidente di Aruba Wielerbond, tesorera di Street Wise, staf di coach y tambe diferente coredor di BMX.
Tesorera di Street Wise, Sra. Ischellin van den Berg a yama tur presente un bon bini y a splica un poco riba e unico ekipo cu tin un parke di BMX na Aruba. Tambe e la menciona cu hopi liher nan a traha riba e protocol pa medio di coach Estaba cu mesora a actua y pone man na obra.
Funcionario di IBISA, Sra. Mildred Wever a keda contento cu henter e proceso di ehecucion di e protocol na e parke di Street Wise. Nan ta contento cu IBISA lo yuda na guia esnan cu mester di esaki den nos facilidad y clubnan deportivo. Pa medio di un app nan ta observa y yena e form cu despues lo wordo evalua. Aki nan por mira mesora unda e ayudo por ser brinda na tur cu mester di esaki.
Presidente di AWB, Sr. Juni Croes tabata super satisfecho cu e parke a habri unda e atletanan por a sigui cu nan entrenamento. Principalmente atleta elite manera Shanayana Howell cu tabata tini compromisonan na nivel internacional. E la elogia e bon trabou di coach Estaba y tambe Street Wise cu a actua hopi liher.
Di parti di COA, Secretaria General Sra. Nicole Hoevertsz a bisa cu nan tambe ta contento cu e trabou. Nos atletanan di BMX tin compromiso cu un solo meta. Un danki na e bon cooperacion entre Street wise y AWB nos coredornan por sigui cu nan deporte. E ta contento sigur cu e candidato Olimpico Shanayah Howell cu ta bek den su preparacion pa e clasificacion di e weganan 2020 di Tokyo
Manera Hoevertsz a bisa; entrena activo na cas no ta mescos. Riba pista bo ta mira e resultado. COA y tur e partnernan tey pa yuda pa asina tur cos cana bon den deporte.
Por ultimo coach Pedro Estaba a splica riba e proceso con a traha e protocol specifico pa BMX y e parke di Street Wise. Claro cu e parti general lo keda cual ta uso handsanitizer, tambe puntra preguntanan basico relaciona cu e covid y e distancia social entre e atletanan. Riba e parti tecnico nos por observa cu no lo usa tur salida, lo salta cada bes uno. Mester bisa cu e atletanan tin respet pa e reglanan y ta cumpli. Mas cu claro ta spera cu e situacion lo drecha den corto tempo pa asina cumpli cu e obhetivionan cu a wordo plania.
