Podcast y demostracion deportivo, dos projecto nobo cu COA a introduci durante e Asamblea General
Durante di e Asamblea General di Comite Olimpico Arubano (COA) a eligi miembronan di e directiva nobo cual a introduci den un relato anterior. Tambe a despedi di e miembronan saliente cu a traha cu hopi amor pa e organisacion. E miembronan aki ta Juelle Thode, Bob Nieuw, Roy Mezas, Gabo Mansur y Patrick Melchior. COA a yama tur un danki pa nan contribucion duna den e ultimo 4 añanan.
Pa prome biaha den historia di un Asamblea General, COA a introduci dos projecto cu pronto lo drenta na vigor. E prome ta un podcast unda e media team di COA lo sinta cu cada federaracion deportivo y elabora riba diferente topico manera desaroyo deportivo, structura y planificacion, metanan poni, ambicion deportivo y mucho mas. Specialmente pa e ocasion, e media team encabeza pa Noel Werleman cu ayudo di High Performance a hasi un setup den e ballroom di Holliday Inn Hotel. Aki e presentadornan Andrew y Seever a combersa cu presidente di Arubaanse Voetbalbond, AVB, Randolf Lacle y miembro di directiva Hubert Solagnier pa 15 minuut largo riba e trabou di AVB pa cu e futbol di Aruba.
Un otro projecto lo bira e bishita di Comite Olimpico na e federacionnan deportivo. Antes cada federacion tabata presenta na oficina di COA pa cualkier informacion y/of presentacion. E biaha aki a bini cu e idea cu COA den su totalidad lo hasi diferente bishita di trabou na nos federacionnan deportivo. E ta importante pa bo tin un bon bista con cada federacion deportivo ta funciona na su propio lugar di entrenamento. Durante e pandemia ya caba COA a realisa algun bishita na varios organisacion y cu exito. Diahuebs anochi, e federacion di tennis y basketball, Aruba Lawn Tennis Bond y Aruba Basketball Bond a duna demostracion na e federacionnan presente e forma con nan ta traha cu nan atletanan. Mas cu claro esaki a ser aprecia y tur hende tabata satisfecho cu e idea nobo aki.
Na final tabata tin un brindis na honor di e directiva nobo.
