Malik Hoveling ta logra e medaya di Oro pa Aruba
Awe diaranson Malik Hoveling ta pone un stempel riba e prome lugar
Atleta di IQ Foil, Malik Hoveling ta logra e medaya di Oro pa Aruba den e Weganan Centro Americano y Del Caribe di Mar y Playa na Santa Marta, Colombia.
Despues di e triunfa luna pasa cu un medaya di Plata pa Aruba den e Weganan Suramericano Asuncion 2022 na Paraguay, e hoben atleta Arubano di IQ Foil, Malik Hoveling a sigi cu su racha victorioso ora e ta domina e competencia di IQ Foil for di comienso te final aki na Santa Marta, Colombia.
Despues di e triunfa den tur 4 dianan di careda nabega sin perde uno, awe diaranson Malik Hoveling ta pone un stempel riba e prome lugar y e prome medaya di Oro pa Aruba den e Weganan Centro Americano y Del Caribe di Mar y Playa. Es mas cu e tremendo presentacion di Malik, e ta logra clasifica den e disciplina di IQ Foil pa e Weganan Panamericano Santiago 2023 e proximo aña na Chile.
Sin duda nos delegacion na Santa Marta, Colombia bou guia di Hefe di Mision, Rodymar Geerman ta bibando momentonan bunita y grandi pa nos deporte ya cu den Aruba su prome salida y di nos prome atleta ya caba nos ta logra medaya di Oro.
Di parti di e famia di COA nos kier a felicita atleta Malik Hoveling, su coach Sam, e federacion di sailing y Aruba completo cu e medaya maximo aki.
