Atletanan pa Rosario2019 ta conoci

Atletanan cu lo representa Aruba den e Weganan Sur Americano de Playa Rosario 2019 ta conoci.

E aña aki, Aruba lo competi den tres wega importante faltando 1 aña pa sera e ciclo deportivo na Tokyo 2020. Den luna di maart proximo nos atletanan lo competi den e Weganan Sur Americano de Playa na e ciudad di Rosario, Argentina. Despues di varios aña di cambionan di fecha y cuidad sede, porfin lo continua cu e weganan di playa den e continente Sur America.

E pais di Argentina a host aña pasa e Weganan Olimpico Hubenil na Buenos Aires cu tabata un exito rotundo y no tin duda cu e ciudad di Rosario ta cla pa ricibi e aproximadamente 2000 atleta procedente di 14 pais den Sur America, entre nos dushi isla di Aruba.

Aruba lo competi den cuater ramo di deporte esta Beach Tennis femenino y masculino, Beach Volleyball femenino y masculino y Open Water Swimming. Nos delegacion lo consisti di e siguiente 10 atletanan

Nos tin como Beach Tennis e atletanan Sander Castro hunto cu Aksel Samardzic ken lo ta forma e duo masculino y pa e duo femenino Maud Iza Celaire lo bai hunga cu Dominique Hopman.
Den e parti di Beach Volleyball nos tin e atletanan Masculino Fransua Angela y Eddy Toro y den femenino nos tin Mali Rafini y Shekeva Jones.
Pa e Open Water Swimming nos lo tin e atletanan Lucien Peterson y Florence Kock. Como comission techico di COA lo biaha Beto Thiel y pa e medical support lo bai Francis Maduro. Wanda Broeksma lo representa COA na e weganan di Playa.

Na banda di e delegacion di atleta nos tin como Hefe di Delegacion, Sr. Junior Dake.