Asunción2022News

Ceremonia di Despedida pa delegacion di Aruba

Aruba lo ta rumbo pa e Weganan Suramericano di Asuncion 2022

Ceremonia di Despedida pa e delegacion di Aruba cu lo competi na e Weganan Suramericano, Asuncion 2022 na Paraguay.

Diaranzon anochi, durante un ceremonia na e oficina di Stichting Sportsubsidie Aruba (SSA), a celebra e ceremonia di despedida di e delegacion di Aruba cu otro siman lo biaha pa e Weganan Suramericano, Asuncion 2022. Na e ocasion aki nos por a mira algun di atletanan cu lo competi na Paraguay y nan mayornan. Tambe presente miembronan di e directiva di COA, e direccion tecnico di COA, e representantenan di e federacionnan deportivo, e coachnan y e media team di COA.

Hefe di Mision, sr. Junior Dake a habri e anochi unda a splica en corto e anochi di despedida. Despues Presidente di COA, sra. Wanda Broeksema a hiba palabra unda su persona a pone enfasis cu e weganan ta e momento pa nos atletanan luci na Paraguay. Segun sra. Broeksema cada atleta mester sinti su mes orguyoso pa e por representa Aruba na e weganan. E atleta mester sa kiko ta su rol como atleta. E lo competi pero tambe siña di otronan y e mas importante, gosa di e momento, gosa di e experiencia unico den bida. Sr. Broeksema kier a gradici e mayornan pa nan input door di tur dia percura pa apoya nan yiu den e mihor forma. Mas cu claro a gradici e Direccion di Deporte di COA y tambe e Directiva di COA pa e trabounan incansabel pa realisa tur e esaki na bienestar di e atletanan.

Den e prome parti di e anochi, Doping Control Officer di RADO, sra. Angelique Koolman, a duna un charla cortico riba e tema di Dopahe, pa asina e atletanan ta bon informa tocante e tema importante aki. Angelique a splica riba e proceso di doping control, ken tur por controla atleta y e importancia pakiko e doping control ta tuma lugar. Despues Dr. Ricardo Vargas a splica riba e tema di uso suplemento y otro productonan cu e atletanan mester tene cuenta cune pa evita problema ora di hasi control di dopahe.

Den e di dos parti di e anochi, Secretaria General di COA, sra. Nicole Hoevertsz a splica riba e proceso di preparacion pa cada ciclo y con e proceso di preparacion ta cana su caminda pa finalmente yega na e seleccion definitivo pa cada un di e weganan. Den e ultimo añanan COA cu su filosofia a cambia unda ta desea pa nos atletanan ta prepara optimalmente y di un nivel competitivo y cu kier of por logra resultado pa Aruba. Aki mester corda cu COA no ta prepara atleta, federacion ta prepara atleta. COA ta duna aprobacion ken ta representa Aruba riba conseho di e Direccion Tecnico cu ta evalua tur atleta, ta compara nan nivel cu e nivel di e otro atletanan den nos region. Tambe a mira e proceso di desaroyo cu atletanan cu a gana e derecho di competi pa Aruba y siña un tiki mas di loke nan sa caba.

Aruba lo competi na Asuncion, Paraguay, den 7 deporte cu 12 atleta. E atletanan cu lo representa Aruba na e Weganan Suramericano, Asuncion 2022 na Paraguay ta como lo siguiente:
Lansamento Open Water – Britta Schwengle, Landamento – Elisabeth Timmer y Mikel Schreuders, Badminton – Mackie Lu y Leyenne Schairer, Bowling – Kamilah Dammers y Abigail Dammers, Ciclismo BMX – Shanayah Howell, Taekwondo Poomsae – Jenniffer Baez, Hisamento di peso – Nathaly Geerman y Vela – Malik Hoveling y Just van Aanholt.
Hefe di Mision, Junior Dake, a duna un splicacion amplio riba e parti logistico y tambe a presenta e complehonan deportivo cu lo wordo usa durante e weganan. Hefe di Mision a anuncia a abanderado di e weganan cu a bira Mikel Schreuders di landamento y Nathaly Geerman di pesas. Por ultimo a reparti e paketenan di uniform na e atletanan presente.

Nos di Comite Olimpico Arubano kier desea e atletanan cu lo representa nos isla tur clase di exito y cu e ultimo siman nan aki di preparacion ta uno fructifero pa logra e mihor resultado pa nos pais.

Related Articles

Back to top button