Britta y Malik lo ta na Santa Marta 2022
E prome edicion di e Juegos Centroamericanos y del Caribe de Mar y Playa 2022
Atletanan Britta Schwengle y Malik Hoveling lo atende e prome edicion di e Juegos Centroamericanos y del Caribe de Mar y Playa 2022.
Despues di e exitoso Weganan Sur Americano Asuncion 2022 na Paraguay, e biaha aki un otro wega grandi ta spera nos atletanan di Aruba. Na Santa Martha, Colombia lo tene e prome edicion di e Weganan Centro Americano y Del Caribe de Mar y Playa, e dianan 19 pa 26 di November proximo. E bunita ciudad turistico di Santa Marta, estado Magdalena, Colombia lo host e “beach games” pa prome biaha den historia di e Weganan CAC. Mas cu claro, Aruba no por keda afor y a eligi dos atleta cu lo representa nos dushi isla na Santa Martha.
E landado femenino, Britta Schwengle lo competi pa Aruba den e disciplina di 5km Openwater Swimming. Dos siman pasa, den e Weganan Odesur na Encarnacion, Paraguay, Britta a logra un di 11 lugar overall entre e mihor landadonan di henter Sur America den e 10km. Tambe mester menciona aserca cu den luna di Juli durante e Weganan di Caribe na Guadelope, Britta ta logra medaya di Brons den e 800m free.
E otro atleta cu lo representa Aruba ta e regatista y medayista di Plata Asuncion 2022, Malik Hoveling cu lo compete den e disciplina di IQ Foil. Sin duda Malik tabata un sensacion durante e Weganan Odesur cu a tuma lugar na e ciudad di Encarnacion unda e deportenan acuatico e tuma lugar. Malik a representa nos dushi isla dignamente y ta logra un medaya di Plata pa Aruba.
Como Hefe di Mision pa e Juegos Centroamericanos y del Caribe de Mar y Playa 2022 lo ta e conocido Rodymar Geerman.
Comite Olimpico Arubano y Aruba completo kier a desea henter nos delegacion tur clase di exito den e prome edicion di e Juegos Centroamericanos y del Caribe de Mar y Playa 2022 na Santa Martha, Colombia.
