Comité Olimpico Arubano a cera aña cu Asamblea General

Diasabra mainta den Ballroom di Holiday Inn, a tuma luga e Asamblea General di COA, caminda e federacionnan miembro tabata presente pa ricibi informacion importante y e relatonan oficial di aña 2023 y e plan di maneho pa aña 2025.
Normalmente COA ta tene dos asamblea durante un aña, pero e aña aki a combina e dos reunionnan den uno, pa asina por a duna e auditor externo nobo, e empresa renombra BDO Aruba cu a inicia su relacion di trabou cu COA na inicio di aña 2024, e oportunidad pa traha un Relato Financiero (Jaarrekening) pa prome biaha.

Apesar di e tardansa, ta contento cu e proceso aki a tuma luga, dunando BDO awor un perspectiva nobo di e parti financiero di COA, cu a resulta di ta un proceso positivo.

A combina e puntonan di agenda di ambos asamblea y a comparti e documentonan prome cu e reunion cu tur federacion miembro pa asina nan por a prepara debidamente.

Despues di e parti protolocario di apertura, presidente di COA Sra. Wanda Broeksema a habri e asamblea oficialmente cu un mensahe di introduccion pa e miembronan.
Secretaria General, Nicole Hoevertsz, a presenta e relato di actividadnan di aña 2023, cu tabata tin como punto clave e renobacion y inauguracion di e edificio di COA cu a bay combina cu bishita di presidente di Comite Olimpico Internacional, Sr. Tomas Bach.
Banda di esaki tambe a ilustra e gran logronan di COA su participacion na Weganan Centroamericano y del Caribe (CAC), San Salvador 2023, y e Weganan Panamericano Santiago 2023. Den tur dos evento COA a logra varios medaya, hasiendo e actuacion di nos atletanan e miho di historia.

E siguiente punto a ser presenta ta e relato financiero di 2023, unda tesorera di COA, Sra. Juelle Teixeira-Thode a splica e proceso cu a ser encamina cu BDO Aruba, splicando cu a pesar cu e proceso a tuma su tempo, ta sumamente contento cu e resultado di esaki.
Sr. Jamil Tromp a presenta e Relato Financiero pa 2023 cu a finalisa cu un resultado positivo, loke a hiba tambe na un aprobacion unanime di e federacionnan presente.
Asamblea finalmente a aproba extension di e contrato entre COA y BDO Aruba cu asina lo sigui e colaboracion pa e proximo Ciclo Olimpico, 2025-2028.

Mirando pa futuro cu optimismo, a presenta e draft pa loke lo bira e plan di maneho y presupuesto di 2025.
Miembronan tambe a haya un resumen di e evaluacion di e Ciclo Olimpico 2021-2024, cu a culmina cu e Weganan Olimpico Paris 2024.

Directora Tecnico di COA, Sra. Monica Fajardo a ilustra e resultadonan di cada wega unda COA a participa durante e ciclo, hasiendo un comparacion cu e weganan di e ciclo anterior. Di e forma aki por a ilustra cu e maneho tecnico a conoce un mehora di rendimento, unda a mira cu e participcion total, cantidad di medaya y calidad di e medayanan a mehora substancialmente. Finalmente a haci un apelacion na tur federacion deportivo pa hunto cu COA traha riba e siguiente generacion di atletanan cu lo mester sigi yuda Aruba mantene of mehora su resultadonan y rendimento na nivel di eventonan Olimpico.

A finalisa e asamblea deseando tur federacion miembro di COA feliz dianan di fiesta y un Bon Aña 2025