News

COA hunto cu DVG y IBISA Aruba a bishita Aruba Aquatics Federation

Aruba Aquatics a entrega e protocol como prome federacion

Dialuna atardi, Comite Olimpico Arubano hunto cu Directie Volksgezondheid y IBISA a haci un bishita di cortesia y tambe di control na e federacion di landamento, AAF kendenan ta e promenan cu a haci entrega di e protocol pa e normal nobo cu tur federacion mester a traha.

Mester bisa cu Aruba Aquatics no solamente a entrega e protocol como e prome federacion pero tambe e clubnan miembro a haci entrega di e protocol specifico cu nan lo usa cu nan landadonan den e normal nobo. Tambe kier a mira con e facilidad mes a prepara pero muy en particular e coachnan di landamento cu ta e actornan principal ya cu nan ta duna e entrenamentonan na e muchanan, con lo aplica e reglanan poni riba papel y ehecuta esakinan den practica pa un temporada hopi largo. E ta bon pa sa si tur hende ta compronde kiko realmente un protocol ta y con cubo tin cu tene bo mes na dje. E grupo sigur a keda satisfecho cu e ehecucion na piscina cu a cana den bon forma.

Awor COA hunto cu DVG y IBISA lo sigui bishita mas federacion unda e siman aki ainda lo pasa na e pista di BMX y tambe na Sailing. Despues di e bishitanan lo sinta hunto evalua y plania e proximo bishitanan. Un total di 11 federacion a entrega nan protocol y tur lo haya bishita. Na final kier pa e deporte di Aruba ta bon prepara pa despues di COVID_19.

Ta bon pa bisa cu e meta di COA, DVG y IBISA no ta pa sanciona, perhudica of multa e federacionnan si topa irregularidad pero mas bien hunto cu esnan concerni guia e proceso unda ta educa, informa y pa hendenan compronde pakiko cosnan tin cu bay den e forma aki y no manera antes.

Related Articles

Back to top button