E deporte di BMX a mira accion awe den Weganan CAC
Feddison ta logra termina na un di 4to lugar
E deporte di BMX a mira accion awe den Weganan CAC, caminda nos tin e ciclista Feddison Flanders representando Aruba.
E careda nan a inicia pa 9’or di mainta, na unda Flanders mester a core den tres careda pa asina busca su clasificacion pa e fase final. Den su prome careda a keda na di tercer puesto, di dos careda di 2do lugar y e ultimo careda ta caba na di 3er lugar y asina logra un posicion den e final.
Den e final Feddison a competi cu atleta nan Elite di nan pais. Entre otro Colombia y Venezuela cu ta dos pais grandi den e disciplina di BMX.
E careda tabata uno bastante sera, caminda na inicio e dos ciclista di Colombia a sali di salida 2 y 6 respectivamente y Flanders na di 4. Den e salida e atleta nan aki a sera Flanders y tuma delanteria. A keda bataya t’e final y toch ta keda cortico di e podium pa 1.674 seconde di e prome lugar y .423 miliseconde di e tercer puesto.
Sigur un gran actuacion di Flanders cu awor ta pone su mira riba e Panamericano cu ta tuma lugar otro anja na Lima, Peru.
