Odesur ta na Aruba
Reunionan riba Plan di Capacitacion y Actualizacion Deportiva Periodo 2019-2020
Ehecutivonan di Organisacion Deportivo Suramericano(Odesur) ta na Aruba unda nan a reuni cu Comite Olimpico Arubano.
Actualmente ta di bishita na Aruba un delegacion di ODESUR cu a bini specialmente pa reuni cu Comite Olimpico Arubano riba e Plan di Capacitacion y Actualizacion Deportiva Periodo 2019-2020. E presentacion di e plan tabata bou encargo di e Director Tecnico y alabes director di Desaroyo di Odesur, Sr. Fabio Ramirez.
Presente pa Comite Olimpico Arubano nos por a mira Presidente di COA, Sr. Roy Mezas Secretaria General, Sra. Nicole Hoevertsz, como tambe miembronan di e direccion tecnico y medico, Sr. Jesus Halabi, Sr. Ricardo Vargas, Sr. Edmundo Josiah, Sr. Patrick Werleman y Sr. Juvenal Nava.
Mester bisa cu e mainta a inicia unda Presidente di COA, Sr. Mezas a duna un splicacion di e trabou di COA na Aruba. Tanto cu Comision Tecnico, Medico y Desaroyo a splica di e trabou cu nan ta eherce pa cu nos federacion, dirigente y atletanan. Tambe a mustra con e data di nos atletanan ta ser warda den un sistema y e programa di doping cu ta ser duna na tur federacion miembro di COA.
Te cu diabierna awor Sr. Fabio Ramirez lo ta na Aruba unda lo tin diferente encuentronan importante.
