Thakaidzwa ta e liaison di COA na Corsow
Thakai ta elabora riba su bishita na Aruba relaciona cu e participacion di e atletanan di Corsow
Thakaidzwa Doran ta e liaison di Comite Olimpico Arubano na Corsow
Thakai ta elabora riba su bishita na Aruba relaciona cu e participacion di e atletanan di Corsow pa Aruba den weganan regional, continental y Olimpico.
“For di anja 2019, mi persona ta traha den colaboracion cu Comite Olimpico Arubano. Esaki a cuminsa for di e Weganan Panamericano di Lima, Peru unda Corsow tabata tin participacion bou bandera di Aruba cu 3 atleta ya cu esakinan no por a participa pa Corsow. Despues di esaki nos a cuminsa evalua con nos por sigui yuda atletanan di alto rendimento di Corsow sigui participa bou capa di COA pero ricibiendo den e caso aki e ayudo financiero y tecnico di Olympic Solidarity di Comite Olimpico Internacional, IOC”, Thakai a conta.
Segun sr. Doran a sinta analisa henter e proceso aki cu e direccion tecnico di COA y aki a yega na un acuerdo cu algun atleta lo por cuminsa cu e proceso di preparacion pa loke ta e clasificacion di e Weganan Centro Americano y del Caribe San Salvador y e Weganan Panamericano Santiago 2023. E atletanan Amir Daou, Philip Elhage (ambos tiro), Ingrid Gonesh (Equipo Mixto den tiro), y Just van Aanholt (vela), Rob Timmermans (karate) ya ta preparando fuerte pa cu esaki y ta den e programa di COA. E ciclista Lisa Groothuesheidkamp a confronta cierto dificultad pa keda cla cu e proceso di cambio di licencia pa asina e por competi pa Aruba. E atletanan di Corsow ya caba trahando segun e regla y criterianan poni pa e direccion tecnico di COA y cada uno tin cu cumpli cu tur e rekisitonan pa asina por keda forma parti di e programa di clasificacion y tambe haya e ayudo nesecario cu ta bini for di IOC.
Mirando e maneho nobo di COA despues di e pandemia di Covid_19, tur cos a wordo adapta y esaki mas cu claro ta yega na e oido tambe di e atletanan di Corsow cu lo kier participa bou bandera di Aruba. Aki e comunicacion ta hunga un rol hopi importante pa asina e atleta di Corsow ta constantemente na haltura rond di e desaroyo di e proceso y programa di COA y aki ta na unda Sr. Doran su envolvimento ta crucial, pa evita cualkier eventualidad. Thakai Doran su rol na Corsow ta cu su persona ta un punto di contacto pa e atleta di Corsow cu tin e deseo di drenta di e programa di COA y tambe yuda e federacion nan na Corsow cu lo kier competi den e Weganan Panamericano y aki contact e federacionnan di Aruba pa wak si por traha riba esaki. Den pasado a hasi esaki caba cu por ehempel cu e deportenan di Karate, Tiro y Ciclismo. Por ultimo, Thakai ta hopi gradici pa e oportunidadnan aki mirando cu Aruba ta brinda e posibilidad na e atletanan di Corsow competi na nivel mas halto den e deporte mundial.
