NewsRosario2019

Ceremonia despedida Rosario2019

9 atleta di Aruba lo participa na e Weganan di Playa Sur Americano

Ceremonia di despedida pa e atletanan di Aruba cu lo participa na e Weganan di Playa Sur Americano Rosario 2019

Diahuebs anochi den presencia di famia, dirigente, coachnan y invitadonan a tuma lugar e ceremonia di despedida pa e atlentan cu lo bai representa Aruba na e Juegos de Playa Sur Americano 2019 cu lo tuma lugar na e ciudad di Rosario, Argentina.

Hefe di Mision pa dicho weganan, Sr. Junior Dake a habri e anochi gradiciendo tur pa nan presencia. A duna un amplio splicacion riba kiko tur e atlentan por spera di e weganan aki. Tambe a elabora riba e codico di conducta cu semper tini pa nos atletanan ora representa Aruba den exterior. A splica detaya riba e biahe pa Argentina y a duna un bista riba e complehonan deportivo cu lo ser usa na e Weganan di Rosario 2019.

Representantenan di e directiva di COA tambe a hiba palabra e anochi aki. Den su funcion como vice-presidente di Comite Olimpico Arubano(COA), Sra. Wanda Broeksma a splica di e envolvimento di COA y tambe un tiki di su funcion den COA. Sra. Broeksema lo tey presente na e Weganan di Rosario pa sostene nos atletanan di Aruba. Secretaria General di COA y miembro ehecutivo di IOC, Sra. Nicole Hoevertsz tambe a hiba palabra na e anochi di despedida. Sra. Hoevertsz a elabora riba e historia y e existencia di e weganan di playa. Pa prome biaha cu un delegacion di atleta di Aruba lo ta participando na e weganan di playa. Un momento sigur historico pa nos atletanan y sigur nos dushi isla.

Na final a yama e atletanan hunto cu nan coach pa asina ricibi nan tas cu nan pakete di paƱa y tambe e famoso pin di COA cu sigur ta super popular. A divulga e abanderado pa e Weganan Sur Americano di Playa Rosario 2019. A toka honor na e atleta Olimpico di beach volleyball, Srta. Mali Rafini pa carga e bandera di Aruba durante di e Ceremonia di Apertura.

E Weganan Sur Americano di Playa di Rosario lo cuminsa for di dia 14 pa 23 di maart. Lo conta cu un total di 2000 atleta di 13 diferente pais cu lo competi den 13 diferente deporte. Aruba lo ta participando den e deportenan di Beach Volleyball, Beach Tennis y Open Water.
Den Beach Tennis nos tin e atletanan Sander Castro hunto cu Aksel Samardzic ken lo ta forma e duo masculino y pa e duo femenino Maud Iza Celaire lo bai hunga cu Dominique Hopman.

Den e parti di Beach Volleyball nos tin e atletanan Masculino Fransua Angela y Eddy Toro y den femenino nos tin Mali Rafini y Shekeva Jones.

Pa e Open Water Swimming nos lo tin e atleta Lucien Peterson.

Staf y personal di Comite Olimpico Arubano y Aruba completo ta desea nos atletanan tur clase di exito.

Related Articles

Back to top button