NewsOlympic News

Dia Olimpico 2020

E fecha 23 di juni ta un dia pa conmemora e Dia Olimpico

Awe riba e fecha 23 di juni, mundo henter lo conmemora e Dia Olimpico.
Tur aña riba e fecha 23 di juni, Movimento Olimpico rond mundo ta celebra Dia Olimpico. Tabata riba 23 di juni, di aña 1894, cu na e Universidad di Sorbonne, Paris, Francia, un grupo di persona, encabesa pa e filosofo, historiado y gran idealista, Baron Pierre de Coubertin a dicidi di re-activa e Weganan Olimpico.
Comitenan Olimpico Nacional y nan miembronan Olimpico rond mundo ta organisa celebracionnan special awe riba e fecha 23 di juni pa conmemora “Olympic Day”.
Durante e 126 aniversario aki tambe lo wak Comitenan Olimpico Nacional y Federacionnan Internacional di cinco continente hunto cu atletanan Olimpico, yama “Olympians” encurasha tanto hoben como adulto pa ta envolvi den actividadnan deportivo, cultural y educativo. Lo enfatisa riba e lugar cu deporte tin den sociedad y con deporte por yuda comunidad yega na tolerancia social pa asina alcansa bon boluntad.

E tres pilarnan di Dia Olimpico ta move, siña y descubri. Uzando e mensahenan aki organisacionnan awe ta promove e beneficionan di ehercicio fisico y inspira hende pa bira activo y yuda nan conoce deportenan nobo via e idealnan Olimpico, sin importa cu habilidadnan of background.

Pa varios aña Comite Olimpico Arubano hunto cu su partnernan manera IBISA y Aruba Bank N.V. a celebra e Olympic Day cu e popular careda du 1, 2 , 3 Km pa e scolnan basico. E evento semper a resulta super exitoso mirando e acohida inmenso di participacion di tur e scolnan basico rond Aruba. Cada participante tabata haya nan T-shirt di Olympic Day completamente gratis como recuerdo. Mester bisa cu na nos scolnan basico na Aruba alumnonan a celebra e Dia Olimpico cu actividadnan deportivo, esaki pa siña y conscientisa nos muchanan riba e movemento aki.
Sinembargo debi na e pandemia COVID-19 tur plan a cambia por completo mundialmente, esaki na Aruba tambe. No obstante di esaki asina mes tin planea pa haci un estafette virtual, hunto cu tur Comite Olimpico Nacional rond mundo.

Related Articles

Back to top button