Comite Olimpico Arubano a firma acuerdo di colaboracion cu e compania Ernst & Young.
Aunke Comite Olimpico Arubano y Ernst & Young tin mas cu 20 aña ta trahando hunto caba, tog a opta pa firma un acuerdo nobo, extendiendo asina e colaboracion, dunando mas contenido na e relacion entre COA y EY.
Diabierna durante un atardi ameno na oficina di Comite Olimpico, presidente di COA, sra. Wanda Broeksema y Secretaria General Nicole Hoevertsz, den presencia di sr. Garrick de Cuba y sr. Jonah Arshad Warner di EY a firma e acuerdo mutou entre e instituto y e compania mundialmente renombra.
Presidente di COA, sra. Broeksema a expresa cu tabata un dia masha importante, bon y positivo pa COA mirando e relacion pa mas di 20 aña trahando cu EY. Aña pasa durante e Asamblea 2023, EY a compromete nan mes pa e ciclo nobo te 2028 unda nan lo keda como e partner stategico di COA. Pa sra. Broeksema esaki ta hopi importante ya cu ta trata di un compromiso mutuo, tin un respet y relacion di trabou cu lo por sigui traha cu otro. Binti aña ta bisa hopi di e relacion entre COA y EY.
Partner di EY, sr. Garrick de Cuba a conta cu EY pa mas cu 20 anja ta trahando den colaboracion cu Comite Olimpico Arubano y pa EY COA ta un partner hopi importante mirando cu COA no ta focus riba un grupo chikito sino un grupo grandi di deportista y federacionnan den nos comunidad. Na banda di esaki, COA ta hiba e nomber di Aruba na nivel internacional ora mester competi y presta den deporte. E intencion di e colaboracion ta cu EY ta yuda COA cu servicionan profesional y den areanan nobo caminda cu e institutonan ta haya nesecidad den e esaki. Tambe EY a combersa cu secretaria general, sra. Nicole Hoevertsz pa mira con e instituto ta mira su mes den futuro unda ta ricibi ayudo financiero for di instancia internacional. Aki EY lo por asisti COA cu banda di relatonan financiero, por yuda tambe pa informa e stakeholdernan riba environment, parti social, maneho di e organisacion, en corto loke den e mundo empresarial ta conoci como e area di “Environmental, Social and Governance” (ESG).
Na final e representantenan di EY y COA a saca algun potret na e renchinan Olimpico, demostrando cu e colaboracion ta uno fuerte y solido.
