News

Presupuesto y Plan di Maneho 2023 aproba

19 federacion afilia na Comite Olimpico Arubano a presenta na e ultimo Asamblea General di 2022

Presupuesto y Plan di Maneho 2023 aproba durante e Asamblea General di Comite Olimpico Arubano

Diasabra mainta den ballroom di Holiday Inn, 19 federacion afilia na Comite Olimpico Arubano a presenta na e ultimo Asamblea General di 2022. Presidente di COA, Wanda Broeksema a inicia e mainta yamando tur esnan presente bon bini y duna inicio na e Asamblea. Secretaria General, sra. Nicole Hoevertsz a hiba palabra unda e la elabora riba e agenda di e mainta. A bay over na aproba e relato di Asamblea General di 9 di juli 2022.

Representante di EY, sr. Antoine Lobato a presenta e presupuesto pa aña 2023 unda su persona a duna un splicacion amplio riba henter maneho financiero.
Secretaria General di COA, sra. Nicole Hoevertsz a presenta e plan di maneho di e aña 2023. Durante su presentacion, Nicole a elabora riba e parti di Recursonan Humano, Finansas y Mercadeo y Comunicion, Desaroyo Deportivo, Gobernanza y Operacional. Varios punto interesante a bini padilanti durante e presentacion di sra. Hoevertsz. Un di nan cu sigur a resalta ta e bishita di e presidente di Comite Olimpico Internacional, sr. Thomas Bach den luna di maart, 2023. Na mesun momento a eligi unanimamente, sra. Juelle Thode como e tesorero nobo di COA, Juelle lo reemplasa sr. Giovanni Bermudez, cu na juli ultimo a tuma retiro for di funcion aki.

Durante e Asamblea, COA a invita un orador for di Brasil den persona di sr. Pedro Cavazzoni cu ta presidente di e Confederacion Brasilero di Deportenan di Sneeuw cu a presenta tocante e tema di “Good Governance”. Via Zoom, sr. Cavazzoni a splica di e trabou eficiente y profesional cu nan bin ta hibando e ultimo anjanan y ta logrando bon resultado pa e pais na nivel internacional. E forma con e federacion ta traha ta uno reconoci na internacionalmente, un model cu hopi federacion rond mundo tine como ehempel. Na Aruba, Comite Olimpico Arubano tin e intencion di introduci un sistema similar den nan organisacion y cu pa nan miembronan. Trahando di e forma aki, nos federacionnan lo profesionalisa mas aun, trahando mas eficiente unda e resultadonan kizas lo papia pa nan mes. Na final, e federacion nan a haya e presentacion di Pedro Cavazzoni hopi interesante y a reacciona, hasiendo varios pregunta na su persona.

COA kier a gradici tur e Federacion nan presente y tambe kier a desea nan como tambe e pueblo di Aruba feliz dianan di fiesta den compania di nan famia y pa aña 2023 ta uno cu mas logro deportivo pa Aruba.

Related Articles

Check Also
Close
Back to top button