Cali Valle 2021News

Weganan Panamericano Junior 2021 a conclui

Despues di 10 dia di competencia

Aruba su delegacion lidera pa e abanderadonan Tom de Vries y Melanie Tromp a drenta e Velodromo di Cali p’asina dispidi di e Weganan Panamericano Junior 2021.
Desde 25 di november a tuma lugar e Ceremonia di Apertura y e siguiente dia Aruba a mira accion den badminton, natacion y bmx. Den e deporte di badminton e dos atletanan di Aruba, Leyenne y Mackie a cay afo den nan evento single pero den nan duo event nan a gana dos wega. Pero den di dos wega contra di Panama, Mackie a sufri un lesion pa cual no por a continua cu nan participacion.

Den e deporte di natacion, Patrick Groters a logra pone Aruba Dushi Tera resona dos biaha cu dos oro y como tambe un medaya di silver. Chloƫ Farro a logra record personal den e 50m Free y logrando yega Final A den esaki tambe. Anahi Schreuders a landa dos ocasion y no a logra clasifica pa anochi. Jaydon Croes, e atleta mas hoben di e delegacion a bolbe bek Aruba satisfecho cu e experiencia logra den e Weganan Panamericano Junior 2021.

Den BMX, nos tabatin atleta Dquon MCourtar y Shanayah Howell. Den e ronda di clasificacion Dquon no a logra pasa pa e ronda semifinal. En cambio atleta Howell tabata un di e mihor prospecto pa nos isla y a demostra esaki den tur ronda cu el a participa terminando na di prome lugar den tur Moto. Den e final desafortunadamente Howell su contrincante a sera su persona y ta cay na inicio di e careda pa cual a kita e posibilidad di medaya di oro di e atleta.

Pa e atleta di Aruba den Taekwondo, Nathan Fradl e experiencia na Cali tabata uno cu no ta desea di corda. Esaki debi cu e atleta no a logra participa debi na un problema di salud cu a encontra durante e madruga prome cu mester a hasi pesahe cu a hasi’e imposibel pa e por competi.

Aruba a continua su participacion den e deporte di Weightlifting cu e atleta Jeremy Dijkhoff cu den e Weganan di Cali a logra un record personal y gana hopi experiencia tambe mirando cu e hoben tin solamente 17 aƱa y ainda lo tin un oportunidad pa participa na e siguiente Weganan Panamericano Junior cu ta tuma lugar na 2025.

Den e siguiente siman e atletanan di Landamento Artistico y atleta di IQ Foil Windsurfing a yega Cali pa inicia preparacion pa nan competencia. Diahuebs ultimo nan a inicia cu esaki di cual landamento artistico a inicia cu e duet tecnico cu e atletanan Angelina Hamoen y Mariajose Salazar. E siguiente dia nan a tuma lugar e team tecnico como tambe team liber cu ta consisti di e atletanan Edianne Croes, Angelina Hamoen, Mikayla Morales, Mariajose Salazar y Melanie Tromp.

Diasabra tabata e ultimo dia di competencia pa nan y esaki a termina cu e duet liber. Tur e atletanan aki ta di un edad hoben y por a experiencia loke ta trata un competencia di e caliber aki na un Wega Panamericano den e ocasion aki Junior.

Tom de Vries den IQ Foil Windsurfing a inicia su competencia diahuebs di cual den e prome tres regatta tabata separa pa un punto cu e 3er lugar cual tabata Mexico. E di dos dia di competencia no tabata e mihor pa e atleta de Vries mirando cu a encontra problema cu su equipo den e prome regatta di dia y despues algun decision no bon a hasi cu Tom no a logra e mihor resultado den e 2do dia di competencia. E 3er y ultimo dia, Tom a uza un diferente strategia pero no tabata suficiente pa logra subi podium. Den un conversacion cu e atleta el a indica cu awor ta mas conciente ki momento por tuma risico, mirando cu cierto momento a tuma risico cu no a sali di bon.

Asina aki Comite Olimpico Arubano ta conclui su participacion den e Weganan Panamericano Junior Cali 2021 cu Aruba na di 17 lugar den e tabla di medaya, cu dos oro y uno silver di Patrick Groters. Esaki tabata e prome edicion di e Junior Panam y e siguiente ta tuma lugar na 2025. COA conhuntamente cu su Direccion di Deporte ta satisfecho cu e participacion di nos atletanan como tambe e coachnan y directiva di cada Federacion pa nan empeƱo. Tambe na mes momento na tur esnan cu a sigui nos atletanan di cerca via nos canal di medionan social.
Danki atletanan, danki coachnan y danki Aruba.

Related Articles

Back to top button