Schedule di competencia di nos atletanan Arubano den e Weganan Olimpico Hubenil Buenos Aires 2018 ta prakticamente cla.
Awe porfin nos a logra haya algun update di e schedule di competencia di nos atletanan hubenil den e YOG2018. Aunke nos tin casi tur dato ainda falta algun orario di competencia pa yena. Mester bisa aserca cu mayoria competencia lo tuma lugar den e Green Park mientras landamento lo ta den e area di e Villa Olimpico.
Siguientemente e informacion cu nos tin te cu awor aki.
BEACH VOLLEYBALL FEMENINO Y MASCULINO
Beach volleyball femenino di Aruba, Kayla Arends – Beachvolleyball Aruba 297 y Mali Rafini lo ta den Pool F hunto cu Venezuela, Rwanda y Mexico. Nos damitanan lo hunga dialuna 8 di okt, diaranzon 10 di okt y diabierna 12 di okt.
E beach volleyball masculino di Aruba, Brian Howell y Raibiently Mercalina lo ta den Pool hunto cu Indonesia, Venezuela y USA. Nos hobennan lo hunga diadomingo 7 di okt, diamars 9 di okt y diahuebs 11 di okt.
Mester bisa cu e Orario di e weganan lo ta pending ainda.
TENNIS
Patrick Sydow di Aruba lo enfrenta den e prome ronda un contrincante fuerte esta Drew Baird di USA, esaki diadomingo dia 7 di okt pa 8.45 di mainta. Pa su mañan dialuna 8 di okt, Partick lo hunga double hunto cu Nick Hard(Republica Domicana) unda lo enfrenta e duo Dawani/Tashbulatov. Diamars 9 di okt, Patrick Sydow lo hunga Mix Double hunto cu Makatsaria(Georgia) unda lo enfrenta duo Naito/Tajima di Japon.
LANDAMENTO
Anahi Schreuders lo landa 50m pecho e diadomingo 7 di okt pa 10or di mainta y si e bay semi- final lo ta 6or di atardi mientras e final mes lo ta dialuna dia 8 di okt pa 6or di atardi
Y diamars 9 di okt, Anahi Schreuders lo landa 100m pecho pa 10or di mainta y si e bay semi- final lo ta 6or di atardi mientras e final mes lo ta dialuna dia 10 di okt pa 6or di atardi .
TRIATHLON
E tri-atleta Giannon Eights lo competi dialuna 8 di okt pa 11or di mainta hunto cu 33 otro atleta. Mester bisa aserca cu Giannon lo tin chens di competi den un relay Internacional esaki diahuebs 11 di okt pero esey ta pending ainda.
